Kva er arbeidsretta rehabilitering? 

Arbeidsretta rehabilitering (ARR) er spesialisert medisinskfagleg rehabilitering kombinert med prosessar retta mot å koma i eller behalde arbeid. Arbeidsretta rehabilitering  skal styrke den enkeltes arbeidsevne og bidra til meistring av helserelaterte, miljømessige og personlege problem som hindrar deltaking i arbeidslivet.

Arbeidsretta rehabilitering inneber parallelle og tverrfaglege intervensjonar mot helse og arbeid. Tilbodet inneheld tverrfaglig kartlegging, tilpassa fysisk aktivitet og kognitive åtferdsretta endringsprosessar gjennom veiledning individuelt og i grupper. Det bli lagt til rette for at brukaren startar eigne lærings- og treningsprosessar som fremmar bevisstgjering av eigne ressursar og moglegheiter, og som bidreg til å få tilbake eller behalde arbeidsevna og deltaking i arbeidslivet. 

Målgruppe 

• personar som står i fare for å bli sjukemeldt
• personar som er sjukemeldt med rett til sjukepengar, herunder langtidssjukemeldte der det lokale helsevesenet ikkje har lukkast i å få den sjukmeldte tilbake i arbeid

Arbeidsretta rehabilitering rettar seg mot personar med ulike helseutfordringar (fysiske, psykiske eller sosiale).Tilbodet er diagonseuavhengig og ope for alle som møter inntakskriteriane. Tilbodet er vidare retta mot personar som kan unngå å bli sjukmeldt og sjukmeldte personar som kan koma raskare tilbake i arbeid etter eit opphald ved AiR- Klinikk.

Hovudårsak til innsøking eller tilvising til arbeidsretta rehabilitering er vanlegvis helseavgrensingar og nedsett funksjonsevne som vanskeleggjer deltaking i arbeidslivet. Vi ser at når ein går gjennom ein vanskeleg helse- og/eller livssituasjon, kan ein oppleve at det er vanskeleg å fylgje opp på arbeid samstundes.

AiR - Klinikk har størst erfaringsgrunnlag i brukargrupper med muskel- og skjelettlidingar og/eller lettare psykiske lidingar, der angst, depresjon og ei kjensle av å vera utlada ofte er vanlege fylgjekomplikasjonar for brukargruppa vår.

Mål med opphaldet 

Opphaldet skal hjelpe brukaren til å styrke eigne ressursar og betre sin funksjon slik at ho/han kan få tilbake og lære å ta vare på arbeidsevna. Eit fire vekers rehabiliteringsopphald skal leggje til rette for endringsprosessar og bidra til auka bevisstgjering av brukarens ressursar og moglegheiter til arbeidslivsdeltaking. 

Dette vil vi oppnå ved at: 

• Eit tverrfagleg team samarbeider om å gje nødvendig bistand til brukarens eigen innsats for å oppnå best mogleg funksjons- og meistringsevne, sjølvstende og deltaking i arbeidslivet.
• Opphaldet inneheld tverrfagleg kartlegging, tilpassa fysisk aktivitet, veiledning individuelt og i grupper med medlemmane i det tverrfaglege teamet, undervisning og kontakt med arbeidsgjevar og lokalt støtteapparat.
• Fire vekers rehabiliteringsopphald er døgnbasert. Det er gruppevise inntak på 17 brukarar ein gong i veka. Gruppene er blanda med omsyn til diagnosar. Nye brukarar møter på AiR onsdag ettermiddag.

Innhald 

Før opphaldet 

Etter at ein brukar har fått plass ved AiR – Klinikk blir ho/han bedt om å ha eit møte med sin arbeidsgjevar for å avklare mogleg tilrettelegging og oppfylging i etterkant. Brukaren skal fylle ut eit skjema saman med arbeidsgjevar som beskriv tiltak som eventuelt alt er sett i verk, og kva for moglegheiter som finnast for å setje i gang fleire tiltak om nødvendig.

Under opphaldet 

Kvar gruppe blir knytt til og fylgd opp av eit eige fagteam under opphaldet. Teamet er sett saman av lege, attføringskonsulent, sjukepleiar, fysioterapeut og idrettspedagog. Dei fyrste dagane er sett av til kartlegging av kvar enkelt brukar sine utfordringar og plager når det gjeld målet om å koma tilbake i arbeid. Her blir også brukarane introdusert  for ulike undervisningstema og treningsaktivitetar.

Opphaldet er vidare organisert med daglege treningsaktivitetar, undervisning, gruppesamtaler og individuelle samtaler med dei ulike fagpersonane i teamet. Gjennom dei fire vekene vil brukarane få erfaring med ulike aktivitetar som vil kunne vera med på å auka bevisstgjering av eigen funksjonsevne. Dei vanlegaste treningsaktivitetane er gruppetrening etter psykomotoriske prinsipp i treningsrom, gruppetrening i gymnastikksal og oppvarma basseng, og friluftsaktivitetar. Omlag halvparten av brukarane får tilbod om riding.

Brukaren vil òg få veiledning individuelt og i grupper som vil kunne bidra til auka bevisstgjering av samanhengar mellom eigne tankar, kjensler og kroppens reaksjonar. Under heile opphaldet arbeider vi for å starte endringsprosessar som fokuserer på å auke bevisstgjering av brukars ressursar. Målet er at brukar får klargjort sine val i forhold til vidare arbeid.

Under opphaldet utarbeider brukar saman med det tverrfaglege teamet ein individuell plan/handlingsplan som skal auke moglegheitene for deltaking i arbeidslivet. Planen er forankra hjå brukar, arbeidsplass, fastlege, Nav og eventuelt andre i det lokale hjelpeapparatet. I tillegg vil brukaren bli fylgt opp i etterkant etter behov.

Vidare oppfylging 

Der teamet ser at brukaren har behov for vidare oppfylging etter avslutta opphald på AiR – Klinikk, vil teamet ta kontakt med brukaren og arbeidsplass innan to veker etter utskrivinga.

Last ned brosjyre om programmet her (pdf)

Ta gjerne kontakt med oss dersom du ynskjer meir informasjon.

Telefon: 35 06 28 00, e-post: post [alfakrøll] air [dot] no