Opphald hjå oss

I denne omvisinga vil du få eit lite innblikk i kva programmet arbeidsretta rehabilitering inneheld.

Dette er det største tilbodet til AiR – Klinikk, men mykje av innhaldet gjeld også for våre andre rehabiliteringsprogram. Du som skal delta på eit av desse vil difor også finne mykje aktuell informasjon her. 

Vi arbeider i tverrfaglege team og du vil bli møtt av eit team som er sett saman av:

• lege
• sjukepleiar
• fysioterapeut
• idrettspedagog
• arbeidskonsulent

 Det tverrfaglege teamet arbeider tett saman med deg for å hjelpe deg til å betre din funksjon slik at du kan nå målet om å få tilbake eller ta vare på arbeidsevna.

Vår behandlingsfilosofi er grunnlagt på ei heilskapleg forståing av mennesket der kropp og sjel heng saman. I programmet legg vi difor vekt på at både dei fysiske, psykiske, sosiale og eksistensielle dimensjonar i eit menneske heng saman.

Viktige element i denne tenkinga er at kvart menneske har ansvar for eige liv og dei vala det gjer. Alle menneske har ressursar, sjølv om nokre ressursar kan vera ubevisste. På AiR ynskjer vi difor at du skal ta i bruk ressursane dine og vere aktiv i eigen rehabilitering.  

Ein viktig del av opphaldet er undervisning om tema som:

• Samanhengen mellom fysisk og psykisk helse
• Fysioterapeutens time
• Treningsoppstart, treningsvanar og trening etter opphaldet
• Arbeidskonsulentens time
• Kosthaldsundervisning

For å få eit best mogleg utbytte av undervisninga er det i stor grad lagt opp til at brukarane skal vera deltakarar. Det skjer gjennom gruppesamtaler, tid for refleksjon aleine, og deling av tankar og meiningar med andre. I gruppesamtalene er regelen at ein alltid kan vera så aktiv som ein sjølv ynskjer.

Vi ynskjer at aktivitetane skal vera lystfremjande og ei kjelde til fysisk og psykisk overskot. Det er eit mål med opphaldet at du skal oppleve ei fysisk, psykisk og sosial funksjonsforbetring. Vidare har vi som mål at du skal få fornya motivasjon for vidare trening og aktivitet etter opphaldet.

Brukarane får innføring i fleire ulike treningsformer innandørs for å prøve ut kva som passar best for den einskilde brukar. Både i forhold til å koma i betre form, og til å sleppe spenningar i kroppen og roe ned. Viktige element er:

• Bevisstgjering av eigne ressursar
• Mestring – grensesprenging – grenssetting
• Glede - positive opplevingar
• Sjølvkjensle og sjølvtillit
• Trygging.

 Dette arbeider vi med gjennom aktivitetar som leik, dans, styrke, uthald, spinning, varmtvassbasseng, riding, klatring, rørslegruppe og avspenning.

På fritidsavdelinga finn du tilbod om ei rekkje kurs, aktivitetar og kulturtilbod. Nokre av våre faste kurs er:

• lærarbeid 
• kniv og slire
• toving
• Qigong
• kalligrafi
• bildeverkstad (Her brukast ulike teknikkar med hovudvekt på ei kunstterapeutisk tilnærming.)

Kva får du med deg frå AiR? Den dagen du reiser får du ein sluttrapport som alle i ditt team står bak. Dette er ditt verktøy på vegen vidare, og her finn du blant anna ein konkret plan om å koma tilbake i arbeid i forhold til arbeidsgjevaren din, Nav, fastlege eller bedriftslege, og eventuelt andre aktørar og hjelparar.

Gjennom vekene du har vore hjå oss har vi saman arbeidt for at du har fått styrke og mot til å vende tilbake til arbeid. Vi veit at vegen vidare er ulik frå brukar til brukar, og vi arbeider for at alle skal reise frå AiR med ein konkret plan der målet er å koma tilbake i arbeid på kort eller lang sikt.